قصة الأهلي يلعب في الدوري الانجليزي [الأرشيف]

مشاهدة النسخة كاملة : قصة الأهلي يلعب في الدوري الانجليزي

totos_acmilan

10-04-2008, 10:36 PM

ملحظة الموضوع منقول و انا مرضتش حتى اكتب توتوس مكان عمر عشان بصارحة موضوع بستاهل علية فلوس

الأهلي يلعب في الدوري الانجليزي

احكي لكم القصة من الأول

بدأ الموضوع وأنا كنت في انجلترا كنت رايح اعمل شوبنج كدة وراجع علي طول

المهم أنا كنت هناك

وكنت بشتري كورة اديداس وكانت اخر قطعة

لسة بسأل عن السعر لقيت التليفون بيرن

مين الـ.....اللي بيكلم دلوقتي ده

لقيت واحد بيقولي بسرعة روح قدم طلب عاوزين نلعب في الدوري الانجليزي

طب وانا مالي

يا عم عمر انت مش اهلاوي

قلت ايوة ايه دخل الاهلي بالموضوع

قالي روح قدم طلب للأهلي انه يلعب في الدوري الانجليزي

وهنا بدأت الحكاية

كل الكلام الجاي بقي بالانجليزي يعني مترجم

وانا بقدم الطلب لقيت هناك بيكهام كان بيخلص شوية ورق كدة

قلتله:بيكهام حبيبي

قالي:ايه ده عمر!!!فبنك من زمان يا راجل

محدش بيشوفك ليه-كل ده طبعاً كان بالانجليزي-ازيك عامل ايه

انا قلت:انت بتعمل ايه هنا بس

قالي :ابدا كنت بخلص شوية ورق كدة وراجع امريكا علي طول...وانت بتعمل ايه هنا

قلتله:راي اقدم طلب ان الاهلي يلعب في الدوري النجليزي اصلنا زهقنا من الدوري المصري محدش عارف يغلبنا اهو يمكن لما نيجي انجلترا نتغلب

واهو منه نلعب في دوري ابطال اوروبا

قالي:عندك حق...بقولك ايه انا عاوز العب في الأهلي اصلي زهقت من جالاكسي الناس دي شكلهم كدة بيضحكوا عليا ومشفتش منهم ولا مليم لحد دلوقتي واهو منه اخد بطولات بقي

قلتله:قشطة...يبقي تنزل معايا مصر وتتفاوض مع الخطيب وحسن حمدي ... دول حبايبي

قالي:ماشي

المهم انا دخلت لرئيس الاتحاد قالي عمر انت فين من زمان يا راجل

قلتله:معلش عاوزين نلعب في الدوري الانجليزي بس خلصلي ورقي بسرعة الله يخليك

قالي:معلش والله ... روح لبلاتر ده حبيبي

قلتله:لا عادي اروحله وماله ما انا فاضي اصلي...ماشي يا سيدي بس المرة الجاية يا ريت تكون فاضي عشان مش حتعدي علي خير

انا بقي خدت بيكهام وروحت زيونخ

وانا ماشي في الشارع انا وبيكهام الناس قعدت تقول:هو مين اللي ماشي مع عمر ده

المهم وصلنا لمقر الفيفا لقيت بلاتر كان طالع بالصدفة عنده حموضة فبيجيب سفن اب كانز

قالي : الله فينك من زمان يا عمر...يا مليون خطوة عزيزة... ومين اللي معاك ده

قلتله:ده بيكهام يا بلاتر انت نسيت ولا ايه

قالي:تسدأ فعلاً بيكهام..مش مهم..انا كنت رايح اجيب سفن اجيبلك معايا؟؟

قلتله:بس انا اللي حدفع

قالي:ماشي يا سيدي..والكابتن حيشرب حاجة...قلتلي ده مين

قلتله:ده بيكهام يا بلاتر

قالي:اه صح فعلاً ده انت لسة قايلي...بس ايه الفرص السعيدة دي

المهم واحنا قاعدين نشرب سفن قدام الكشك اللي قدام مقر الفيفا

بلاتر قالي:وايه سر الزيارة العزيزة دي

بيكهام قال:عزيزة دي تبقي....ههههههه

بلاتر قام قايل:لذيذ اوي الكابتن ده...ده بيكهام مش كدة

قلتله:سيبك بقي من بيكهام وعزيزة وخلينا في المهم...احنا دلوقتي عاوزين الأهلي يلعب في الدوري الانجليزي...ايه النظام؟؟؟

قالي:يلعب يا باشا..يلعب...ميلعبش ليه..طالما الاهلي عاوز يلعب في الدوري الانجليزي يبقي لازم ولا مؤاخذه نلعبه

رجعت بقي انا وبيكهام مصر وقعدت انا وهو الكابتن حسن حمدي عشان نشوف ايه الكلام...بيكهام حيلعب في الأهلي ولا لأ

بقية الحكاية بعدين بقي عشان انا زهقت بصراحة ورقبتي بتوجعني

totos_acmilan

10-04-2008, 10:37 PM

حنكمل بقي

انا والكابتن حسن قاعدين في كارلوس كافيه بنشرب عصير قصب

واحنا في وسط الحديث المهم لقيت واحد داخل جري بيكهام افتكره حاس ياخد توقيعه هو

طلع جاي ياخد حديث صحفي معايا

وبعد ما خلصنا الحديث وازاي انا كافحت عشان الاهلي يلعب في الدوري الانجليزي

الصحفي قالي:هو مين الكابتن اللي قاعد حمبك ده سحنته مش غريبة عليا

قلتله:يا عمي ده بيكهام

كابتن حسن حمدي قالي:بصراحة انا اتخنقت من بيكهام ده....محدش يعرفه خالص

قلتله:ده عشان انا قادع معاه بس...لما بيكون لوحده بيبقي غير...ده احنا واحنا ماشيين في سويسرا الناس كانت بتبصلنا وتقول مين اللي ماشي جمب بيكهام ده

قالي:يا راجل

قلتله:حغشك؟؟؟؟

قالي: ماشي ماشي

بيكهام قالي:هو احنا مش حنمضي ولا ايه

قلتله:اتقل...يا كابتن حسن عاوزين نخلص العقد بتاع الراجل

قالي:بيكهام

قلتله:اه

قالي:ماشي

خلصنا العقد

والحلقة الجاية حنشوف الاهلي عمل ايه في الدوري الانجليزي

totos_acmilan

10-04-2008, 10:40 PM

المحامي بتاع الأهلي في قضية الحضري طلب تاريخ الحضري كاملاً منذ قدومة إلي المشكلة الأخيرة

طبعاً الكابتن حسن حمدي مش حيقعد يعمل البتاع لوحده

كلمني وقالي تعالي يا عمر عشان نخلص الورق بسرعة

طبعاً انا استغليت الفرصة دي وماتخرتش

بس المشكلة اني كنت في سويسرا عشان بلاتر كان عاوزني في كام مشوار كدة

قلت بالمرة وانا هناك اعدي عالهارب اصبح عليه ونشرب انا وهو فنجال شاي وارجع مصر بسرعة عالنادي الأهلي عدل

رحت خبطت علي الباب بس بيكهام مكانش معايا بقي المرة دي عشان كان عنده تمرين مع الأهلي

المهم الحضري فتحلي قالي:مش ممكن عمر...انت في سويسرا من امتي

قلتله:مفيش كلام مابينا...انا جاي اقولك انك ان شاء الله حتيجي علي الأهلي وتروح ونبيعك لنادي السكة الحديد...وخلي سيون وبلاتر ينفعوك بقي

قالي:طب بقولك ايه انا عارف معزتك عند الكابتن حسن حمدي...بالله عليك انا عاوز ارجع...انت واقف ليه اتفضل ادخل... البيبسي عالنار والقهوة في التلاجة

قلتله:يا عمي انا مليش دعوة انا مبحبش القهوة...انا ماشي...سلام

مشيت طبعاً وفكتني منه خالص وهو عمال يحاول يرجعني وانا رافض تماماً إني اكلمه

انا بقي ركبت 128 ورجعت علي مصر

واحنا ماشيين علي طريق الاسكندرية زيونخ الزراعي الكاوتش فرقع

نزلت انا وكلمت مين بقي؟؟؟

كلمت بلاتر قلتله:ايوة يا بلاتر العربية عطلت...ابعتلي حد بسرعة

المهم بعتولي واحد ميكانيكي شغال في سويسرا

الراجل طلع نصاب وخد من بلاتر ضعف المبلغ المهم مش موضوعنا

انا رجعت الاهلي وهناك قابلت طبعاً أعضاء النادي كلهم عارفيني عشان انا اللي خليت الأهلي يلعب في الدوري الانجليزي

وعمالة تشاور عليا وتقول البطل اهو وبتاع

وصلت مكتب حسن حمدي لقيته قاعد في المكتب مع الخطيب

قلتلهم:خير

الخطيب قالي:احنا بنحاول نجيب لعيب سوبر بس الموضوع ده ميطلعش برة عشان انت عارف احنا داخلين علي دوري انجليزي وعاوزين نلعب في دوري أبطال اوروبا وبتاع

قلتله: متخافش خالص...روني مستعد ييجي...وكرستيانو كان بيلمحلي انه عاوز يلعب...واحنا عندنا بيكهام وابو تريكة وبركات...نجيب بيتر تشيك وناخد الدوري...والكوكا عليا

قالي:ماشي جيبلنا الناس دي كلها

وسيبنا احنا نكتب تاريخ الحضري للمحامي عشان يشوف هو حيعمل ايه

انا بقي سيبتهم ومكانش في جيبي غير ربع جنيه

نزلت ركبت الترام العابر للقارات واديت للكمسري ربع جنيه قالي لأ ده الترام غلي بقي بنص

انا قلتله:طب انا حدفع بعدين

قالي:براحتك ... انت نازل فين

قلتله:انا نازل في مانشستر

قالي:طب بسرعة عشان فاضل محطتين علي مانشستر

بالصدفة قابلت كرستيانو في الترام

فرحت سلمت عليه

وطبعاً دفعلي هو وقلتله عالحكاية والرواية وانه لازم ييجي يلعب في الأهلي

قالي:ماشي ... عشان انت اللي عرضت عليا انا حفسخ عقدي مع مانشستر واجي العب في الأهلي

قلتله:بقولك ايه متروح تكلم الواد روني عشان ييجي يلعب عندنا..ولو قابلت تشيك قوم معاه بالواجب

طبعاً رونالدو ميقدرش يرفضلي طلب

راح كلم روني وتشيك والحمد لله وافقوا

في الحلقة القادمة من الأهلي في الدوري الانجليزي:الأهلي يبدأ مشواره بمباراة نارية مع تشيلسي...وبيتر تشيك يتعرض للاصابة في وسط المباراة

totos_acmilan

10-04-2008, 10:42 PM

طبعاً يا جماعة زي ما انتم عارفين ان الأهلي حيلاعب تشيلسي في أول ماتش

عشان كدة كان لازم نوقف بيتر تشيك حارس عشان هو ادري بلعب تشيلسي

بس الحمد لله كان في استاد الأهلي اللي في مدينة أهلي سيتي اللي بنيناها في شارع سوريا..يا عمي في هناك شارع سوريا مش عندنا احنا بس

طبعاً بقي الجمهور كان كتير جداً رابطة الأهلي جت ورانا لانجلترا

وفوكس قاعد في المدرجات اهو

انا شيفوه

قبل الماتش بـ3 دقايق أنا قاعد جمب مانويل جوزيه والبدري قاعد جمبي من النحية التانية

جوزيه يكلمني برتغالي وانا اترجم للبدري والبدري يقوم يدي التعليمات للاعيبة

بدأ الماتش الكورة مع تشيلسي...دروجبا يديها لكالو ...كالو مسابش حد الا وعداه...مرة واحدة وائل جمعة وقع علي الأرض مصاب...ايوة يا عم ما هو رجع من قطر

عملنا التغيير وائل جمعة خرج ولقيناش حد ينزل بداله جبنا واحد من الجمهور ونزل بداله والموضوع اتحل...بس للأسف طلع فوكس

الكورة تاني مرة مع تشيلي...جون تيري ...لدروجبا ...دروجبا وفوكس ..دروجبا وفوكس

دروجبا وفوكس دروجبا والجون...واحد صفر لتشيلسي

واحد بقي من جماهير تشيلسي رمي طوبة علي عين تشيك الواد وقع مقدرش يكمل

وامير في نفس ذات اللحظة جالة مغس

بدلنا تشيك ونزلت انا مكانه بقي

تشيلسي كمان هجمة خطيرة...وهوبا انا طلعت غلط المهم دروجبا عداني وخلاص دروجبا علي خط الجون ولسة حيحطها

رحت انا ناطت من علي نقطة ضربة الجزاء وضربت دروجبا ومسكت الكورة

الحكم حسب بنلتي واداني انذار

دروجبا قال بقي:وربنا لادخلها فيك يا حارس يا .............مش مهم تعرف قال ايه

قلتله:طب والله ما هي دخلة

قالي:حنشوف

دروجبا عمل نفسه حيشوط...انا نطيت غلط

قام شاط النحية التانية

رحت انا وانا في الهوا مغير اتجاهي وناطت وراها

تيجي يمين انا وراها...شمال انا وراها...لحد ما مسكتها

طبعا جمهور الأهلي كله قعد يقول...ارقص يا عمر

وانا مبعرفش ارقص

المهم...كرة خطيرة كمان هبا دروجبا داخل دروحبا والجون وهوبا ضربة جزاء...هو دروجبا ده موراهوش غيري ولا ايه؟؟؟

والانذار التاني ليا بس الحكم نسي يطلع الطرد

هههههههههههههههههههه

انا بقي واقف

دروجبا شاطها من مرة واحدة وانا رحت ناطت وراها صاددها

راح دروجبا قايل:وربنا لاقول لأمي

المهم بقي فاضل 5 دقايق والماتش فرب يخلص

تاني كالو شاط شوطة من برة منطقة الجزاء أنا رحت ناطت جايبها وحطيت الكورة عالارض

وقلت:الهجمة دي جون التعادل

انا رحت ماشي دروجبا دخل عليا عديته

وبعدين جون تيري عديته وسبت الجون فاضي ورايا

عديت نص الملعب انا جاي اشوط خلاص...راح واحد مزحلق عليا...رحت انا واقع واخدت ضربة حرة مباشرة علي حدود منطقة الجزاء

ابو تريكة جاي يشوط جاله شد

نزلنا بقي مين؟؟؟

بيكهام بدل ابو تريكة

بيكهام جاي يشوط وقع علي الارض اتصاب وطلع برة الملعب يتعالج

قلنا خلاص...جلبرتو يشوطها...جلبيرتو خلاص داخل

رحت انا طلعت اجري من منطقة الجزاء بتاعتنا رحت شايط الكورة ... وجووووووووووووووووووووووووووووووووووون

التعادل...اخيرا...الاهلي سيتي بقت حمرا...والجماهير بقي...اووووووووو اهلاوي.....اوووووووووووو اهلاوي

والواد فوكس طلع يجري زي المجنون

ومانويل جوزية جالي مخصوص وقالي:فعلاً يا عمر انت اللي كنت ناقص الفريق

انا رجعت علي طول علي جوني طبعا بطل بقي

تشيلسي بيسنطروا

هبا دروجبا شاطها جامدة جدا بس الحمد لله جت في العارضة وطلعت اوت

انا بقي استغليت الفرصة..ناديت الواد فوكس قلتله:انا حباصيهالك وانت باصيهالي عشان اشوطها في الجون

قالي:طبعاً يا باشا

انا لعبتها لفوكس ...فوكس لعبهالي

وشوطة...عالية..وهوبا ...الحارس طلعها كورنر

انا طبعا استغليت الموقف ورحت انا العب الكورنر

رحت هناك لقيت كل لاعيبة تشيلسي واقفين في الجون خايفين مني

بس لاحظت ان في ما يعادل خرم دبوس في الجون ممكن ادخل منه جون

رحت لافف الكورة في الجون دروجبا عمل فيها ناصح وكان عاوز يشوتها بس معرفش

وجووووووووووووووووووووووووووووون...التقدم للأهلي عن طريق اللاعب المتألق عمر وهبان

في أخر ثانية

دروجبا شاط الكورة من نص الملعب رحت انا بدل ما امسكها عكستها علي الجون بتاعهم...وهوبا الكورة جت في العارضة الحكم صفر

والحمد لله كسبنا

وطبعاً اخدت احسنلاعب في المباراة...والجماهير قعدت تقول ارقص يا عمر

وجوزيه جه قالي بالبرتغالي: انا مش عارف حنعمل ايه من غيرك...في خمس دقايق دخلت جونين...احمدك يا رب واشكر فضلك

في الحلقة القادمة من الأهلي في الدوري الانجليزي...الأهلي يلعب امام مدلسبرة..وميدو يسجل هدفين في أول دقيقة...انتظرونا

totos_acmilan

10-04-2008, 10:43 PM

الحلقة الخامسة...ميدو مقطعنا يا رجالة

كنا بنستعد لماتش مدلسبرة...وعارفين انه ممكن يكون أصعب من ماتش تشيلسي عشان فيه اتنين مصريين وهما ميدو وشوقي

احنا بقي بنستعد وبتاع لقينا مرة واحدة قال ايه رونالدو اتصاب وبيكهام وتريكة ووائل وتشيك كانوا مصابين من الماتش اللي فات

وامير عنده برد جامد مش حينفع يلعب...فأنا تكرمت ووقفت جون...وطبعاً فوكس نزل بدل وائل

كدة مين حينزل بدل تريكة؟؟؟

انا قاعد بفكر مع مانويل جوزيه نعمل ايه يا جوزيه نعمل ايه يا جوزيه

قلتله:بس

قالي:ايه يا خبيبي لقيتها

أيوة يا خواجة...كان فيه واحد اسمه حلمي كدة اتهيقلي بيلعب كورة

الهمد لله...لقاها العبقري

يا عمي ربنا يستر بس ويكون بيعرف يلعب

يا سيدي خليها علي ربنا

المهم انا كلمت حلمي عالشات وقلتله

قالي:من بكرة الصبح عالساعة 10 بالليل حكون في الأهلي سيتي

عارف العنوان يا حلمي

طبعاً يا ابني...ده اللي في شارع سوريا

صح كدة سلام بقي عشان جوزيه بيناديني

الواد حلمي وصل مطار انجلترا الدولي...انا كنت جايبله هدية تريله مانجا..راح حضن التريلة وقالي واحشني يا عمر

اكتشفت بقي ان حلمي احول

قلتله:يا عمي شكلك كدة حتفضحني قدام الخواجة

يا سيدي خليها علي ربنا

وبعد مرور 5 ايام من التدريب المتواصل بس توقف الا لدخول بيت الراحة

جوزيه بالبرتغالي:يا جماعة احنا انهاردة جايين نكسب بقي عشان الماتش الجاي صعب

انا ترجمت بقي بالعربي:يا جماعة احنا انهاردة جايين نكسب بقي عشان الماتش الجاي صعب

ونزلنا الملعب

الماتش بدأ

ميدو يديها لسانلي...سانلي لميدو ..ميدو يشوط...الكورة تخبط في مدافع بعدين فيا بعدين في العاؤضة بعدين فيا تاني بعدين في حلمي

وجووووووووووووووووووووووووون

احنا سنطرنا من هنا لقينا ميدو خطف الكورة وهبا عدي كلهم ميدو وحلمي...ميدو وفوكس...ميدو وبشير...ميدو والجون...ميدو والشبطة

وجووووووووووووووووووووووووون

مش ممكن جونين في دقيقة واحدة

طبعاً بقي انا مسكتش...رحت قلت للخواجة ميدو ده لازم تشوفله حل

قالي:العبوا انتم بس وحتكسبوا

احنا سنطرنا تاني...ميدو يخطف الكورة..بس فوكس يقطعها...يطلعها لروني...روني لحلمي...حلمي يشوط اي حاجة

وجووووووووووووووووووووووووون

جون جون جون جون...سواها سواها حلمي في الدقيقة 3 من عمر اللقاء

حلمي بقي جي بيسألني...هو ايه اللي حصل

قلتله:العب انت بس وان شاء الله حنكسب

ميدو بيسنطر...يديها ياكوبو...ياكوبو لسانلي...سانلي لشوقي...شوقي يرفعها جوة منطقة الجزاء لميدو

وهبا...وجووووووووووووووووووووووووون...لأ الحمد لله صدتها

لعبتها لحلمي بسرعة حلمي شاط واحدة من بتوعة بس جت في عالجون بتاعنا

انا نطيت وراها...بس للأسف وجووووووووووووووووووووووووون

3-1

في الدقيقة 5

مش ممكن

الخواجة بقي قال مين الـ..........اللي اقترح عليا اني انزل حلمي.......ده ملوش فيها...وبيشجع مصر...واحنا معاهم...كوكاكولا الراعي الرسمي للمشجع المصري

يبديل للأهلي متعب نازل وحلمي طالع

يالهوي...طيب متعب ده فقر أكتر من حلمي

مش مهم

متعب يدي الكورة لروني...روني لمتعب...متعب لروني...روني والجون...و وجوووووو...لأ مش ممكن دي عارضة والحارس يطلعها كورنر

طبعاً الكورنر ده اختصاصي

انا سيبت الجون ورحت العب الكورنر

لفيتها في الجون...بس الحارس جابها

عطاها قدام للمهاجم يا كوبو

انا رحت عملت اسبرنت

يا كوبو يشوطها

وهبا

الجون فاضي...فوكس بيحاول يجيبها...حيجيبها...بس أنا خبطت فيه خليت الكورة تروح باتجاه المرمي مباشرة...بس انا رحت رامي فوكس وفوكس راح شايطها...جامدة جداً...رايحة عالجون التاني والحارس بيتفرج....عبيط ده ولا ايه

وجووووووووووووووووووووووووون

الحمد لله...3-2 لمدلسبرة

وفاضل خمس دقايق عالشوط الأول

عاوزين نطلع متعادلين عالأقل

ميدو بيسنطر...سانلي بيشوط باتجاه المرمي...وتتصد في اللحظة الأخيرة وفوكس يشتتها أي حاجة تنزل عند روني...روني عدي خمسة وحطها لمتعب أسهل ما يكون...متعب والجون...ويرفع الكورة من فوق الحارس....بس المشكله انه متعب...ومرة واحدة الأرض انشقت وطلع منها واحد طلع الكورة أوت بدماغه

لا اله إلا الله...جه منين ده

طلعت كورنر

انا رحت لاعبه...باتجاه المرمي مباشرة...وجووووووووووووووووووووووووون

بس الحكم محسبوش

انا رحت ضارب الحكم...راح مطلعلي كارت أحمر

انا عملت نفسي طالع...والحكم مش واخد باله رحت داخل الملعب تاني

والشوط خلص من غير ما الحكم ياخد باله

الشوط التاني

طبعاً 3-2 لمدلسبرة لازم نكسب الماتش ده عشان يبقي عندنا 6 بونت

المهم...الشوط بدأ....ميدو شاط شوطة من الشوط المبروكة بتاعته

وجووووووووووووووووووووووووون

يا جماعة حرام

الواد ده محظوظ

المهم بقي انا رحت عملت ايه

قلت اما اجرب حظي يمكن أطلع زي ميدو ولا حاجة وأدخل جون

روني يلعبها لمتعب

متعب يلعبهالي...وانا اشوطها...وجووووووووووووووووووووووووون

مش ممكن...4-3

مدلسبرة بيسنطروا واول وا مبدو لمس الكورة رحت انا عامل اسبرنت وازحلقت علي ميدو وخطفتها وعملت فيها مارادونا وعديت كل الليبعة بالجون ورحت حاططها في العارضة زي الحمار...ومتع جه يكمل عليها والجون فاضي ومفيش حد...راحت الأرض انشقت تاني وطلع منها واحد طلع الكورة كورنر...والله انا بقول متعب ده ميلعبش كورة تاني

يخرب بيت الفقر...يعني الأرض متنشقش ويطلع منها الراجل ده مع ميدو ليه؟؟؟

المهم الكورنر بقي رحت انا لاعبه

وجووووووووووووووووووووووووون

احمدك يا رب 4-4

لسة فيه امل...راح ميدو مسنطر وراح شايطها انا بقي وقفتلها...لاقيتها جت في وشي وراحت باتجاه الجون التاني...ومتع براسة والحارس نط وراها

الأرض انشفت وطلع منها نفس البني ادم بس خبط في الحارس

وجووووووووووووووووووووووووون

اخيراً يا متعب

باقي الماتش بقي قتلنا اللعب وخلاص كفاية كدة

في الحلقة القادمة:استني لما افكر بعدين ابقي اكتب
ههههههههههههههههههه

totos_acmilan

10-04-2008, 10:45 PM

الحلقة السادسة:بعيداً عن الكرة

أنا اخدت بيكهام ورني وروحنا وروحنا نلعب في جنينة القصر بتاعي...لأ الكدب خيبة...هي فيلا

المهم رحنا احنا التلاتة نلعب كورة في جنينة الفيلا...وكنت مقطعهم يعني...طبعاً هما الأتنين كانوا بيلعلوا جون مشترك عليا وانا كنت كاسبهم 7-0

ولقينا مرة واحدة فوكس وحلمي داخلين كدة ولابسين ترينجات بقي وبتاع...وحلمي نضف وبقي يحط جيل...فوكس بقي يحط جلة

لعبنا انا وحلمي علي فوكس وروني وبيكهام...كان ماتش عسل...حلمي دخل 17 جون...كلهم فينا...وكسبنا 22-17

وحلمي طبعاً هداف الماتش

خلصنا لعب وكل واحد راح استحمي في...اصل عندي 15 حمام في البيت

بعد ما خلصوا أنا بقي رحت عملتلهم مفاجأة...فول وفلافل

روني وبيكهام كانوا مبسوطين اوي...حلمي وفوكس كانوا مقروفين...عشان مش بياكلوا غيرو

بعد ما بيكهام وروني مشيوا أنا أخدت حلمي وفوكس وطلعنا علي مطعم الكباب والكفتة اللي جمب الاستاد...ركبنا الجاكواربتاعتي

بعد ما خلصنا و انا وفوكس عملنا نفسنا بنغسل ايدنا...وظلعنا من غير ما حلمي يحس...ودبسنا حلمي في الاخر...دفع 170 جنيه استرليني..طبعا هو مش بتفرق معاه الحاجات دي..لعيب في الاهلي بقي

كل نزلت فوكس عند بيته وروحت أنا بقي اخد دوش في بيتنا

مرة واحدة لقيت صرصار طالع من البلاعة...انا عملت فيها خبيث...وجيت من وراه ورحت ضاربه بالشبشب...راح جاري...يمين انا وراه...شمال انا وراه

وصلت لعنده رحت ضربه...وراح هو نط فوق الشبشب...ولما نزل من عالشبشب...رحت ضاربه...وقعت رجله...قالي وربنا لاقول لامي...قلتله قولها ما هي صرصارة زيك يعني حتجيب منين

وانا بقي مش في دماغي بتفرج علي ماتش برشلونة وريال مدريد لقيت مجموعة صراصير جايين يهجموا عليا...رحت انا لبست شبشب...ومسكت فردة شبشب في كل ايد..ويلا يلا يلا...قتلت ييجي خمسين صرصار...بس الصراصير بعد كدة راحوا سيطروا عليا وربطوني بحبل

وقالولي...بقي كدة تطير للواد رجله...الواد بيعيط

وقعدوا بقي يجلدوا فيا

و ويك ويك

وانا بحاول اخلص منهم...واحد قالي:احنا حنربتك كدة ونيمك علي ضهرك لحد ما تموت عشان تتعذب

انا عملت بقي فيها خايف...وقلت بلاش تسيبوني علي ضهري

راحوا فاكني وسايبني علي ضهري

لحد ما طلعوا رحت انا قايم...صراصير اخر زمن

مرة واحدة الموبايل رن...فيه مشكلة في النادي...تعلي بسرعة...احنا محتاجينلك

ايه هي المشكلة...ده اللي حتعرفوه الحلقة الجاية ان شاء الله

totos_acmilan

10-04-2008, 10:45 PM

الحلقة السابعة:البحث عن مهاجم سوبر

انا جريت بسرعة علي مقر النادي الجديد اللي في الاهلي سيتي...بس المشكلة اني احترت اركب البي ام ولا الجاكوار ولا المرسيدس ولا الكابريس

نزلت اخدت تاكسي وخلاص

وصلت النادي بقي ولقيت جوزيه والبدري قاعدين

انا طبعاً مش فاهم فيه ايه

البدري قالي...اخيرا وصلت

ايوة يا عم فيه ايه

متعب حيحترف في نادي سيلتك

مش مهم عندنا روني وحلمي وحسني وبلال...ولو لزم الامر ننزل كرستيانو او ابو تريكة مهاجمين

روني مصاب...وحلمي انت فاهم...وحسني رايح السيلية القطري...وبلال بيفكر لسة يروح برشلونة ولا ريال مدريد بس هو ماشي ماشي

يا لهوي...طيب احنا حنعمل ايه..كدة مفيش غير حلمي

ما احنا جايبينك عشان تشوفلنا مهاجم جامد كدة

انا طبعاً عمال أفكر نجيب مين نجيب مين

لقيتها..نجيب رونالدو...لأ كبير وقرب يعتزل ومصاب اصلا

نجيب بويان بتاع برشلونة...لأ مدخل فينا جونين ومش حيرضي ييجي

اجيب مين

انا بقي قلت حفكر بعدين عشان الناس اللي جايين يلعبوا كورة في البيت تاني دول...متخافش يا حلمي مفيش كباب

الواد مروان بقي كان نازل من مصر جاي يقعد معايا يومين وماشي

ففوكس وحلمي جم ولعبنا 2علي2

انا ومروان ضد حلمي وفوكس

واحنا بنلعب لقينا الخواجة((جوزيه))جه وقعد يتفرج علينا

مروان طبعاً كان مقطعنا ودخل بتاع 10 اجوان ده غير الاخرام والكباري اللي عمال يديها لفوكس وحلمي

الخواجة قال بس...هو ده المهاجم اللي ينفعنا

طبعاً الواد مروان مكانش مسدأ في الأول...بس انا قعدت اقنعه انه خلاص بقي مهاجم في الاهلي ومش بعيد يروح برشلونة

تاني يوم الصبح خدت مروان ورحنا التمرين قبل ماتش غزل مانشستر...اللي ميفهمش غزل مانشستر دي يقولي

المهم الفريق ده لسة صاعد الدوري الممتاز ولسة كاسب ليفربول 8-0 وحاجات غريبة كدة

المهم انا والخواجة قعدنا نحط التشكيل...وطبعا مروان وحلمي كانوا اساسيين عشان معندناش غيرهم

وانا بقي قعدت احتياطي عشان امير حيلعب الماتش ده...وبيتر تشيك مش عارفين حيلعب الماتش بتاع ليفر بول ولا لأ

المهم في التمرين الواد مروان تألق ودخل فيا خمس اجوان اللي هما

خرمني 3 مرات وعداني مرة والخامسة رفعها من فوقي

ولما لعب في التشكيلة اللي ضد امير دخل في امير 4اجوان كلهم اخرام

جوزيه كان مبهور بمروان...بس يا رب يلعب معانا بقي وميرحش فريق تاني

والواد حلمي طبعاَ تألق بطريقة غير طبيعية ودخل 3 اجوان من نص الملعب...بس اجوان صح يعني

وفوكس طبعا كما تجري العادة خد خرمين عسل..واحد من مروان والتاني من مروان برضو

والواد تيفيز بتاع مانشستر ده كان بيتفرج عالتمرين بتاعنا احبط لما شاف مروان

قال بس...شكل كدة الواد مروان حياخد مكاني في تشكيل مانشستر

في الحلقة القادمة:الأهلي يفوز علي غزل مانشستر بنتيجة....مع الرأفة

totos_acmilan

10-04-2008, 10:47 PM

الحلقة الثامنة:مروان يتألق...والأهلي يفوز

بدأت المباراة الصعبة مع غزل مانشستر علي ارض الاخير...طبعا يا جماعة محدش فاهم غزل مانشستر دي جت منين

اقولكم انا...المحلة مدينة مصرية...ومانشستر مدينة انجليزية...وزي ما في غزل المحلة اكيد في غزل مانشستر

المهم الماتش بدأ والكورة معاهم

لقينا الواد المهاجم بتاعهم مشي وعدي تسع لاعيبة من غير ما حد يشوفه

بس وصل عند فوكس... فوكس طبعاً شتت الكورة

الكورة وصلت عند المهاجم بتاعهم التاني..راح اداها لنفس الواد ...عدا كل اللعيبة وفوكس والحارس

هو الشبكة وحيحطها جون

وجووووووووووووو...مش ممكن...الكورة جت في العارضة وشادي طلعها بسرعة كورنر...نفس الولا راح لافف الكورنر...باتجاه المرمي مباشرة

وجووووووووووووووووووووووووووووون

النتيجة 1-0 في الدقيقة 2

بس بتوع الغزل بقي قعدوا يضيعوا وقت ويباسو الكورة لحد الدقيقة 43

في الدقيقة دي سير الماتش اتغير تماماً

مروان خطف الكورة...عدي اتنين هو والجون...يرفعها من فوق الجون

وجووووووووووووووووووووووووووووون

اخيرا... اخيرا... اخيرا

من اول لمسة مروان لمسها جون

مش ممكن

وهنا بقي الماتش زي ما قلت اتغير خالص

الواد مروان اخد ثقة غير طبيعية

بتوع الغزل بيسنطروا ومرة واحدة مروان راح خاطف الكورة وشايطها والحارس وقف زي الاهبل مش عارف يعملها حاجة

وجووووووووووووووووووووووووووووون

مش ممكن

ايه يا مروان الحلاوة دي

كمان مرة بيسنطروا...مروان مخطفهاش المرة دي

حلمي خطفها اداها لمروان...مروان لاحظ اني طالع من الجون ورايح علي الجون التاني...راح رافعهالي من فوق كل المدافعين

انا من مرة واحدة والكورة في الهوا رحت شايطها...راحت طلعت رمية تماس مش ضربة مرمي حتي

المهم الشوط الاول خلص 2-1 والحمد لله

الشوط التاني بقي بدأ

مروان خطف الكورة...وعدي من نص الملعب..الأول والتاني وخرم التالت وعتدي الرابع والخامس مع بعض وعدي 3 جوة منطقة الجزاء...وعدي الجون

وهو والشبكة

وجووووووووووووووووووووووووووووون

مش ممكن الواد ده والله

تاني الناس بتسنطر راح مروان قاطعها وهو طبعا عمال يعدي راح واحد ازحلق عليه مروان خد فاول

الفاول مروان لعبه..وفي المقص

وجووووووووووووووووووووووووووووون

مش ممكن 4 اجوان من اول ماتش ليه

بتوع الغزل بيسنطروا وادو الكورة لمروان بدل ما هو ييجي يخطفها لوحده

راح مروان لاعبها لفوكس ورا

فوكس بقي حب يعمل فيها ميسي وراح وحاول يعدي

بس اتخطفت منه وبقي الواد السوبر ده والجون

طبعا رحت انا سايبله الجون فاضي وقلت هو يدخلها لوحده

بس دي كانت الخدعة سيبته هو يروح ورحت مرة واحدة ناطط علي الكورة اخدتها ولعبتها لمروان

لاعيبة الغزل كلها قعدت وقالت الواد ده اكيد حيدخل جون..بس قالو بالانجليزي طبعا

مروان والجون

وجووووووووووووووووووووووووووووون

الخامس

احنا بقي كنا عاوزين نكسب اكتر واكتر

بس المشكلة مروان كان عايز يدخل الحمام

راح قال للحكم الحكم قاله اصبر شوية الماتش قرب يخلص

مروان بقي راح مدخل كمان 3 اجوان كدة وخلص الماتش 8-1

اول ما الماتش خلص جالنا 4 عروض لشراء مروان شهر يناير الجاي

من برشلونة والريال ومانشستر وارسنال

هل مروان حيروح...هل الأهلي حيكسب الليفر بول

ده اللي حنعرفه الحلقة الجاية ان شاء الله

totos_acmilan

10-04-2008, 10:53 PM

الموضوع وقف عند كده لحد دلوقتى اول ما الرجال الممبدع ينزل حلقة جديدة حنقلهاكوا على طول

hectormousa

10-04-2008, 10:59 PM

thanks totos

hectormousa

10-04-2008, 11:03 PM

على فكره انا كلمت كاك وقولتلو يشوف مكان كده للزمالك معاهم فى الدورى الايطالى ( فشار اوى انا صح ) وقالى ماشى يا مان

بس المشكله هناك فى ايطاليا انتر بياخد الدورة على طول وهنطلع بردوا تانى

يعنى مافيش امل لال لو لعبنا فى دورى سيريلانكا أو الدورى الهندى ( هوه فيه دورة هندى اصلن :blush: ما علينا )

التوقيع : زملكاوى :surrende:

totos_acmilan

10-04-2008, 11:24 PM

العفو يا موسى فى انتظار منك قصة الزمالك فى الكليتشو او الهندشيو

shady sayed zay

11-04-2008, 12:20 AM

ده انت مزاجك عالي وفايق ورايق بس الحق انت خيالك وااسع قوي
بس مستنين بقيت الموضوع اهم حاجه بطوله اوربا شوف كده والله السد القطري هينزل بطوله اوربا ولا لا
ومستنيك تقوللي
وتقبل مروري يا عسل

totos_acmilan

11-04-2008, 01:17 AM

يا شادى مش انان العامل الموضوع ده واحد اسموا عمر و الموضوع عجبنى فنقلتة ليقوا

ابراهيم سعيد

12-04-2008, 12:48 PM

كابتن انا مش هقف عند ولا كلمه من الي انت قلتها الاموضوع واحد بتاع كريستيانو لانه ما وفقش علي طول اما انت قابلته في الترام قالك سيبني افكر لمده خمس دقايق تسالني قالك خمس دقايق ليه قوليه؟........ ابن حلال سالتني ليه ااقولك ليه ر لانه كان مستنيني وانا جاي من افرتون من عند هيما وقالي ايه رايك كيــــــــــــــمو عمر كلمني وقالي اروح الاهلي بس والله يا كـيـــــــــــــمو قالي ان انت وهيماهاترجعو الاهلي تاني ايه رايك قلتله عادي رونالدو انت عارف انا بعزك قد ايه وعايز مصلحتك تعالي يا ابني وربنا يكرمك حتي لا قدرل الله واتصبت ولا حاجه هاشغلك في التابعي عندنا
اوك عمــــــــــر برده لازم تقول دور غيرك

Hunter

12-04-2008, 01:16 PM

اوووووووووووووووووووووووووووووووووووووووووووو
اهلاوي
اوووووووووووووووووووووووووووووووووووووووووووو
اهلاوي

totos_acmilan

01-05-2008, 03:43 PM

الأهلي يخسر من واتفورد...والحارس بتاع الأهلي الله لا يوريكم

بدأت المباراة بضغط كبير من الأهلي عشان ندخل جون مبكر

هبا مروان ماشي...يعدي الاول والتاني ويشوط من برة المنطقة بس الحارس يصدها

تاني مرة حلمي يلعبها حلوة لمروان...مروان والجون يعدي الجون ويشوطها بسهولة بس المدافع بتاع واتفورد يشيل الكورة ويطلعها اوت

مش ممكن هجمتين ورا بعض الاتنين اخطر من بعض بس يضيعوا

تاني مرة مروان يلعبها لحلمي يعدي حلمي هو والجون بس الحارس يطلع في الوقت المناسب ويمسكها

اول هجمة لواتفورد وان تو ثري فور فايف المهاجم والجون يشوطها والحارس واقف زي الـ....يتفرج عليها بس الحمد لله تطلع اوت

مش ممكن

الحارس ده جاي منين

جوزيه طبعاً راح قام ورما النضارة وهو متعصب

واحنا معندناش حارس تاني

مرة واحدة لقينا حد جاي من بعيد

يا تري هو مين

طلع امير عبد الحميد جي هو وناجي

وعلي طول طلعنا الحارس" الـتيــــــــــــــــــــت" اللي هو انا

ونزلنا امير

امير طبعاً لسة راجع من اصابة وحاجات كدة

وعلي طول هجمة مرتدة المهاجم والجون وامير يصدها حلوة جدا ويطلعها كورنر

الكورنر يتعلب وامير يطلع يمسك علي طول

حلوة من امير ايد ورجل فلافيو بالراس...قصدي حلمي بالراس علي طول لمتعب...قصدي لمروان

مروان والجون

وجووووووووووووووووووووووووووووووووووووووون

اخيرا يا مروان الشوط الاول فاضل عليه دقيقتين

مرة واحدة شوطة من نص الملعب امير يصدها بس تخبط في فوكس

وجووووووووووووووووووووووووووووووووووووووون

فوكس بقي زعل وقال:والله ما انا لاعب معاكو تاني...ومشي راح قعد يشجع مع الالتراس

بس اضرب ضرب

بوكس في وش فوكس... شلوت تحت الحزام...ده غير التف والترجيع اللي نزل علي جتته

نرجع تاني للماتش...بس الشوط الأول خلص

بين الشوطين انا وفوكس اضربنا من الجمهور واللعيبة وجوزيه ماكلمش غير معانا...وزعقلنا زعيق

انا وفوكس طلعنا علي اقرب مستشفي جمب الاستاد بتاع الاهلي الدكاترة كلهم كانوا اهلاوية محدش رضي يعالجنا

رحنا كل المستشفيات في الاهلي سيتي كلهم اهلاوية

رحنا مستشفي في المنطقة اللي جمبنا

والحمد لله حصل خير

واحنا قاعدين في المستشفي بنتفرج عالماتش كان جمبنا واحد بيشجع واتفورد

وكان صايع شكله كدة

مروان ماشي بالكورة يبتصيها لحلمي

حلمي يشوطها حلوة

وجووووووووووووووووووووووووووووووووووووووون

الواد اللي كان قاعد معانا في المستشفي طلع المطوة وقال:والله العظيم تلاتة لو كسبتوا لاشرحكم

انا رحت مكلم مستر مانويل قلتله عالوضع

قالي يا عمي اولع بجاز

انا اعملك ايه يعني اخليهم يخسروا

قلتله:ايوة يا عمنا بسرعة بس

قالي:ماشي نتصرف

خلا المدافعين ميلعبوش

والمهاجمين يطلعوا الكور برة

بس لاعيبة واتفورد ملهومش فيها وبيشجعوا انجلترا

معرفوش يدخلوا جون

بس الحمد لله الحكم حسب ضربة جزاء غريبة لواتفورد

وجووووووووووووووووووووووووووووووووووووووون

وبعدها بثانية

جووووووووووووووووووووووووووووووووووووووون

لواتفورد

3-2

ولعيبة الاهلي مش بتلعب

وجووووووووووووووووووووووووووووووووووووووون

4-2 لواتففورد

مش ممكن

الجماهير عمالة تشتم

الماتش خلص

كل اللعيبة جه عليهم الطوب بتاع الجمهور

واليوم معداش علي خير

الصحافة قطعت في فروة جوزيه علي اللي جاب جوزيه

انتظرونا في الحلقة القادمة

totos_acmilan

01-05-2008, 03:48 PM

الحلقة العاشرة: المباراة الأخيرة في الدوري هي التي تحدد البطل

للأسف الشديد الأهلي لم يشارك في أي بطولة في العام ده غير الدوري الانجليزي

انتهت جميع مباريات الأهلي في الدوري بالفوز إلا في مباراة واحدة هي مباراة واتفورد والتي خسر فيها الأهلي تحت تهديد السلاح

ولم يتبقي لنا إلا مباراة واحدة فقط

وهي مباراة مانشستر يونايتد

ومانشستر برضو مخسرش غير ماتش واحد أمام الأهلي

يبقي اللي حيكسب الماتش حيكسيب الدوري

وهنا بقي المشكلة

لأن مانشستر عايز يحافظ علي لقبه والأهلي عايز يثبت انه فريق قوي بجد وقادر انه ياخد الدوري من أول سنة يشارك فيه

تشكلية لاعبي الأهلي

حنلعب 3-5-2

الحارس:أمير عبد الحميد

الدفاع:شادي وفوكس والنحاس ليبرو وراهم

خط الوسط:كرستيانو رونالدو وبيكهام بركات وفتحي

الهجوم:روني ومروان وابو تريكة وراهم

تشكيلة لاعبي المان

حيلعبوا:4-4-2

حارس:فان دير سار اللي حيعتزل الموسم ده لو المان اخد البطولة

الدفاع:جاري نيفيل وريو فرديناند وبراون وباتريس ايفرا

نص الملعب:ناني و كاريك وجيجز وسكولز

الهجوم:تيفيز وساها

قبل المباراة

سادت حالة من التركيز في معسكر الأهلي

وطبعاً أنا مش حلعب تاني خالص عشان أمير رجع وتشيك إن شاء الله راجع قريب

وفي معسكر المان كانوا واثقين من الفوز لأن امير لسة راجع من الاصابة الماتش اللي فات

الأهلي لازم يكسب...ومانشستر لازم يكسب

يبقي أكيد حنشوف ماتش جامد جداً

في غرفة خلع الملابس

لاعيبة الأهلي كانت بتترعش...وجوزيه بيحاول يهديهم

أنا دخلت الأوضة

وقلتلهم:زي ما انتم خايفين منهم هما كمان خايفين منكم...متنسوش انكم كسبتوهم في الدور الأول...حرام تضيعوا كل اللي انتم عملتوه ده...لو مكسبتوش الماتش ده يبقي أحسن نرجع نلعب في الدوري المصري

في انتظار صافرة الحكم

لاعيبة الأهلي كانوا مش قادرين يلعبوا

ربنا يستر...دول أحسن ناس في التشكيل

بداية المباراة

لاعيبة مانشستر بيسنطروا

تيفيز لساها...ساها لتيفيز..تاني تيفيز لساها...ساها لتيفيز

تيفيز يعدي من شادي

تيفيز ينفرد بأمير

تيفيز يشطوها

وجوووووووووووووووووووووووووووووووون

من أسرع أهداف البطولة

بعد 15 ثانية من البداية 1-0 لمانشستر

بس...يبقي أكيد مانشستر ناويين انهاردة علي ستة أو سبعة

لاعيبة الأهلي بيسنطروا

مارو يلمسها لروني

روني لمارو

مارو عند أبو تريكة

أبو تريكة يعملها عالية من نص الملعب لمروان جوة منطقة الجزاء...شوطة من مروان عالطاير قبل ما الكوري تلمس الأرض

بس الحارس يصدها بطراطيف صوابعه وتيجي في العارضة بعدين تطلع رمية تماس للأهلي

شادي يلعبها لبركات

بركات عند فتحي

فتحي شاط والكورة تيجي في العارضة والحارس يمسكها بعد كدة

مش ممكن

مفيش توفيق انهاردة

جمهور مانشستر بقي صوته علي علينا

glory glory man utd

جمهور الأهلي علي صوته

أوووووووووووووووووو أهلاوي

مش ممكن والله ماتش روعة والجمهور مالي الملعب مفيش نملة دلوقتي تقدر تتفرج عالماتش من المدرجات

فان دير سار لعبها عالية لتيفيز...تيفيز لساها...ساها عمل نفسه حيشوط ورواح معدي فوكس

ساها وشادي

يديها لتيفيز

تيفيز والجون

يا تري ايه اللي حيحصل في الماتش بعد كدة

هل تيفيز حيدخلها جون

هل الأهلي حيفوز

هل مانشستر حيفوز

ده اللي حتعرفوه الحلقة الجاية إن شاء الله

totos_acmilan

01-05-2008, 04:28 PM

الحلقة الحادية عشر:الأهلي يعادل النتيجة بس الماتش مخلصش

تيفيز وأمير

تيفيز يحطها في الزاوية الضيقة...بس أمير يشلها بطراطيف صوابعه والكورة تطلع كورنر

ناني عالكورنر...يرفعها يدخل جاري نيفيل بالهيد والكورة في العارضة...الحمد لله

يشتت الدفاع

توصل لكرستيانو...يعدي من واحد ويعملها بينية لمروان...مروان والجون...مروان لمح روني جاي من ورا...ادي الكورة لروني والجون فاضي

وجوووووووووووووووووووووووووووووووون
1-1
الحمد لله
روني يحط التعادل جون جميل جداً
بس في مشكلة واحدة...إن التعادل يعني مانشستر حياخد الدوري بفارق الأهداف
يبقي لازم نكسب
وطبعاً رابطة مشجعي الأهلي صوتها علي بطريقة فظيعة
قول الحق...خليك جرئ...النادي الأهلي...أحسن فريق
أوووووووووووووو أهلاوي
الكورة مع تيفيز
يرجعها ورا عند ناني...ناني يعدي من الأول
يباسيها لساها
ساها يرفعها جوة منطقة الجزاء...بس مفيش حد جوة منطقة الجزاء
طبعاً المدافعين سابوها لأمير
بس هنا كانت المفاجئة
جاري نيفيل طلع يجري بأقصي سرعة عنده وحطها بدماغه قبل ما أمير يمسكها
وجوووووووووووووووووووووووووووووووون
مش ممكن
2-1
مانشستر يونايتد يتقدم
كل ده في الشوط الأول
ولسة في الدقيقة 18
أنا بصراحة مقدرتش أشوف الأهلي وهو متأخر 2-1
سيبت الماتش ورحت البيت اتفرج من هناك أهون ما أشوف الأهلي وهو بيخسر الدوري في الملعب
الطريق فاضي جداً
وأنا ماشي براحتي بقي ومشغل اغنية راحت لمين يا مسدق الأيام
لأني مكنش عندي أي أمل إن الأهلي ممكن يتقدم علي مانشستر 3-2
وخصوصاً إن ده فريق ممكن في أي لحطة يدخل جون
جه في بالي اني اشغل الراديو علي القناة الرياضية
هي حاجة كدة عامله زي قناة الشباب والرياضة عندنا بس علي نضيف
ملقتش الماتش
لقيت اعلان بيبسي
نجم الكرة الانجليزية واين روني...ارقص يا تشيك..خلو بالكم من كرستيانو رونالدو...تفتكروا مين وراه
بس كل ده كان بالانجليزي طبعاً
زهقت من الإعلان نفس اللي عندنا في مصر
حرام
رحت مشغل التلفزيون اللي في العربية بس دي كانت مخاطرة
عشان البطارية بايظة
أنا بتفرج وبسمع التعليق الانجليزي
ومركز في السواقة أكتر من الماتش
ومرة واحدة سمعت
what a goal
مين اللي دخله
للأسف طلع ناني هو اللي مدخله والنتيجة 3-1
والجمهور الأهلاوي صوته بيعلي أكتر مع كل لحظة
الحمد لله وصلت البيت
فتحت اشوف القنوات العربية الأول
لقيت ماتش الزمالك و وغزل المحلة
3-0
للمحلة
شفت قناة مودرن سبورت
لقيت ماتش بتروجيت في دوري أبطال أفريقيا
طبعاً بتروجيت اخد الدوري المصري بعد ما الأهلي مشي
وطلائع الجيش في المركز التاني
والزمالك والاسماعيلي دخلوا دوامة الهبوط
غيرت القناة جبت شو تايم الرياضية
لقيت الماتش بقي 3-2
الحمد لله لسة فيه أمل
بس المشكلة إن الماتش كان فاضل فيه ربع ساعة بس
والأهلي عاوز جونين عشان ياخد الدوري
ابو تريكة لرونالدو...رونالدو قدام عند روني
روني يديها لأبو تريكة
أبو تريكة والجون
أبو تريكة شاط
والكهربة قطعت في اللحظة دي
حراااااااااااااااااااام
اتصلت بحلمي هو كان قاعد في المدرج
أيوة يا حلمي
أيوة يا عمر
أبو تريكة عمل ايه
جون يا عمر
الحمد لله الحمد لله
سلام يا حلمي...ابقي قولي علي أخر الأخبار
قفلت مع حلمي وأنا طاير من الفرحة
بس المشكلة هنا بقي اني مش عارف فيه ايه
فاضل قد ايه
مش عارف أي حاجة
كل اللي أنا عارفه ان النتيجة 3-3
والأهلي لازم يدخل جو عشان ياخد الدوري
وصلتني رسالة عالموبايل
من حلمي
بفتح الرسالة راح الموبايل فصل شحن
أنا عرفت ساعتها إن فيه حالة من الفقر
حاولت أكلم أي حد من تليفون البيت بتاعي
لقيت اني مدفعتش الفاتورة من شهرين فاتوا
خرجت من البيت رحت خبطت علي جيراني وسألتهم علي الأخيار واكتشفت ان الكهربة قاطعة في المنطقة كلها
يا تري هل الأهلي كسب مانشستر وأخد الدوري
ولا لسة في كلام

ده اللي حنعرفه الحلقة الجاية ان شاء الله

totos_acmilan

02-05-2008, 05:20 PM

الحلقة الثانية عشر:مفيش فايدة

خرجت من البيت رحت خبطت علي جيراني وسألتهم علي الأخيار واكتشفت ان الكهربة قاطعة في المنطقة كلها
وسألتهم محدش معاه بطارية نوكيا
أخدت واحدة ودخلت قعدت عندهم عشان نكلم حلمي ونعرف الأخبار
لقيت الدنيا والعة في الاستاد
سألت حلمي:هو فيه ايه
قالي:أبو تريكة دخل جون النتيجة 4-3 لينا

http://img160.imageshack.us/img160/2517/645426trekavs20mannt7.jpg

صورة أبو تريكة وهو بيسجد بعد ما دخل جون التقدم في مانشستر
احنا بنستعد عشان نولع انجلترا كلها
وخارجين ماسكين الأعلام الحمرا
وخلاص بقي بنحتفل اننا أخدنا الدوري الانجليزي
وطالعين عمالين نغني
أووووووووووو أهلاوي
انا مستني حلمي يكلمني يقولي إن الماتش خلاص خلص
بس حلمي ماكلمش
قلت أكلمه أنا
لقيته قافل موبايله
قلت أكيد فاصل شحن
إحنا بنحتفل وبتاع
لقينا مشجعين من بتوع مانشستر بيحتفلوا هما كمان
رحت سألت واحد فيهم:انتم بتحتفلوا عشان خسرتوا الدوري؟؟؟
قالي:روح نام...تيفيز دخل جون التعادل وإحنا اللي أخدنا الدوري
وهنا كانت الصدمة
رحت قلت للجماعة اللي بحتفل معاهم
مكانوش مصدقين
أنا رجعت البيت وأنا مش مسدق
مش قادر اسدق
احنا في أخر دقيقة دخلنا جون أكيد في حاجة غلط
دخلت البيت واستنيت إن الكهربة تيجي
وانا مستني ومنور شمعة وحاططها قدامي
بصيت كدة علي الارض لقيت صرصار ماشي
واضح ان ده نفس الصرصار اللي انا طيرتله رجله
رحت رامي عليه الشبشب راح متفعص علي طول
انا بقي رحت جبت مبيد حشري احتياطي عشان لو امه طلعتلي تاني
لما الكهربة جت جريت عالتلفزيون عشان اعرف ايه اللي حصل...ازاي خسرنا الدوري في ثانية
فتحت علي برنامج هنا القاهرة
لقيت علاء باشا عمال يشتم في الحكم اللي كان بيحكم ماتش الأهلي ومانشستر
ولما جابوا الاجوان لقيت ان ابو تريكة دخل جون وبعدها علي طول اتحسبت ضربة جزاء وهمية لمانشستر واتعادلوا بضربة الجزاء دي
وهي دي اللي خليتنا نخسر الدوري
لازم نعمل حاجة
الدوري ده كان بتاعنا واتخطف منا
قدمنا تظلم وطالبنا باعادة الماتش
بس الطلب اترفض
طيب نعمل ايه
افتكرت احنا ازاي خسرنا ماتش واتفورد تحت تهديد السلاح
وهو ده الحل الوحيد اللي حيخلينا ناخد الدوري
ان الماتش واتفورد يتعاد
واحنا نكسب او حتي نتعادل وساعتها ان شاء الله حناخد الدوري
أنا اخدت فوكس من ايده ورحنا بالعربية الجاكوار بتاعتي عند رئيس اتحاد الكورة الانجليزي
حكينا للراجل علي الموقف
بس كان من الواضح التحيز للفريق الانجليزي
وفتح تحقيق في العملية دي
بس كان في مشكلة واحدة بس
اننا نجيب الراجل اللي كان حيضربنا بالمطوة ونخليه يعترف
رحنا المستشفي سألنا عليه فيها اكتشفنا انه لسة طالع منها
رحنا دورنا علي في المدينة كلها ملقينالوش اثر
نزلنا في فندق كدة تعبان 6... نجوم بس
عشان ننام يعني
احنا نايمين طلعلي مرة واحدة صرصار
ووراه جيش من الصراصير
طلعوا مين بقي
ام الصرصار اللي انا قتلته ده وصراصير جايين ياخدو بالتار
رحنا في داهية
لحسن الحط كان معايا المبيد الحشري
رحت راشش عليهم
كلهم ماتوا الا هي
فوكس صحي من النوم
وقالي: ايه ده يا عم عمر
قلتله :متخافش...دول شوية صراصير كدة وحنخلص عليهم
قالي :بس الصرصار ده مش بيموت
قلتله:يبقي مفيش غير حل واحد
قالي:ايه هو
قلتله:بالشبشب يا فوكس
طلعنا نجري وراه
نزل تحت السرير وراه دخل الحمام وراه
انا طلعت فوكس بره
وقلتله:سيبني أنا حتصرف
سابني فوكس
وأنا والصرصار في الحمام الضيق
رحت رامي الشبشب عليه
راح ناطط وضارب الشبشب بالشلوط
وقالي:في المشمش...مبيكلش معنا الكلام ده
قلتله:طيب أنا حوريك
الكلمة دي عصبتني
رحت ماسك فردة شبشب في كل ايد
هو الصرصار ييجي من هنا اروح ضاربه بفرده
يمشي من النحية التانية اروح ضاربة بالفردة التانية
لحد ما وهو بيجري ازحلق في المية
رحت انا ضاربة بالفردتين مع بعض
راح متفعص
انا دخلت نمت بعد ما خلصت كل ده
تاني يوم صحينا انا وفوكس
ورحنا ندور عليه في كل حتة
لحد ما واحد قالنا انه راح الاهلي سيتي يومين كدة وراجع علي طول
انتظرونا في الحلقة القادمة

totos_acmilan

02-05-2008, 05:38 PM

الحلقة الأخيرة:الأهلي يتوج بطلاً للدوري الانجليزي

أنا أول ما عرفت ان الراجل ده في الأهلي سيتي رجعت تاني

وأول حاجة عملتها إني رحت النادي عشان اقولهم اني عرفت ان الراجل ده في الأهلي سيتي

وأنا معدي كدة لقيت واحد جتة قاعد بيشيش

وقاعد معاه واحد تاني كدة عمالين يبرطموا بالانجليزي

أنا بصراحة شكيت في الراجل ده

قربت منه عرفت ان هو اللي طلع عليا المطوة أنا وفوكس

قلتله:ازيك وازي العيال"هاو ار يو"ايه اخبارك

قالي:أنا أسف جداًَ علي فكرة علي اني طيعت منكم الدوري...أنا جيت هنا عشان نفسي مانشستر يخسر الدوري بقي زهقنا منه...كل سنة مانشستر ياخد الدوري...كل سنة مانشستر مانشستر مانشستر مفيش شتيمة؟؟؟

قلتله:طب يللا بسرعة

رحنا بقي مقر الاتحاد الانجليزي وحكينا لرئيس الاتحاد عن الحكاية والرواية

قالي:طيب احنا حنعمل اجتماع نشوف حنعمل ايه

روحت أنا علي بيتنا عدل

قعدت فتحت مودرن سبورت

كان برنامج استاد مصر

قال فاصل ونواصل

اول اعلان جه بتاع موبينيل

احجز مكانك في طابور العيش وانت مستريح في مكانك

فقط اتصل علي 07777

مع موبينيل وبس

وبعده اعلان فودافون

مع فودافون احجز مكانك في افخم المطاعم المصرية... فقط اتصل علي 04545

عم محمد بتاع الفول...عم جرجس بتاع الفلافل وغيرها من المطاعم المصرية الشهيرة

فقط مع فودافون

وجه بقي اعلان ماكدونالدز

الان اشتري كومبو فول صاروخ واحصل علي سنتدوش فلافل او بتنجان حسب الطلب مجاناً

اتخنقت من الاعلانات وحولت قناة اي ار تي سبورت

لقيت ماتش نهائي دوري أبطال أفريقيا بين بتروجيت والهلال السوداني

بتروجيت كانوا كسبانين 3-0 في ام درمان

والعودة في القاهرة 5-0 لحد دلوقتي

انا جعت...اكلت...تقلت...زهقت...نمت

صحيت علي صوت الموبايل

رسالة؟؟؟

الحمد لله

ماتش الأهلي وواتفورد حيتعاد

بس المشكلة انه حيتعاد بكرة علي طول

تاني يوم رحت عالاستاد عدل

قعدت مع الرابطة قلتلهم عاوزين تشجيع اجمد من اي يوم تاني

احنا داخلين علي منعطف تاريخي

وبدأ الماتش

مروان لروني...روني لحمي...حلمي لرونالدو...رونالدو لتريكة...بركــــــات

وجوووووووووووووووووووووووووووووووون

1-0

لاعيبة واتفورد بيسنطروا

مروان يخطف يعدي كل اللاعيبة

هو والجون

يعدي الجون

هو والشبكة

مروان وقف علي خط الجون مستني اي حد يدخل عليه

لحد ما الحارس راح ناطط عليه راح مروان راجع تاني ومعديه تاني وخرمة وبهدله

وبعد كدة حط الجووووووووون

2-0

بتوع واتفورد بيسنطروا

يخطف مارو...عند رونالدو...رونالدو خرم خمسة وراح شايط الكورة

وجووووووووووووون

3-0

http://img241.imageshack.us/img241/1548/945736ahly20c20ronaldo2ro2.jpg

ودي صورة رونالدو بعد ما دخل الجون

مروان يخطف الكورة تاني

يعدي الأول والتاني بس لاعيب واتفورد يزحلق عليه ومروان ياخد فاول

ابو تريكة عالفاول

ابو تريـــــــــــــــــــــكة

وجوووووووووووووووووووووووووووووووووووووون

4-0

الـــــــــــدوري أهــــــــــــلاوي

الــــــــــدوري أحـــــــــــــــــــمر

الشوط الأول خلص علي كدة

الشوط التاني بدأ واحد من بتوع واتفورد شاط كورة كدة بس امير مسكها

امير ينزل بالكورة عالأرض

وشــــــــــــــــــاط أميــــــــــــــــــــــــر

وجووووووووووووووون

حتي أمير حط جـــــــــــــــــــــــــــــــــون

أخر هجمة في الماتش

مروان لرونالدو رونالدو لتريكة...تريكة عند حلمي...حلمي لبركات

بركات يشـــــــــــــــــــــــــوط

بس الحـــــــــارس مسكها

والحـــــــــــــــــــكم يـــــــــــــــــطلق صـــــــــــــــــــافرة نـــــــــــــــهاية اللقــــــــــــــاء

الأهــــــــــــلي كـــــــــــــــسب الـــــــــــــــدوري

ده يـــــــــــــــــــم لا ينــــــــــــــساه أي أهــــــــــــــلاوي

شـــــــــــــــــادي مــــــــــــــحمد بيـــــــــــــستلم الكـــــــــــــــــــــاس

والجــــــــــــــــمهور مــــــــش مســــــــــــــدق

الـــــــــــدوري أهـــــــــــــــلاوي

الحـــــــــــــمد لله

http://img517.imageshack.us/img517/6910/assadsnh4.jpg

صورة محمد بركات مع الكاس

totos_acmilan

02-05-2008, 05:39 PM

القصة خلصت كده خلاص ان شاء الله لو فى جزاء تانى هبقى اتقله هنا فى المنتدى

abo.shoo2

21-05-2008, 02:28 AM

ya totos enta m3dey 3la fekra law mesh 3arfny ana tare2 daredevil ;) elly m3ak fel clan el kesa de mas5ra ya man teslmlena :)

totos_acmilan

21-05-2008, 08:01 AM

عرفط يا طارق بس لو لاحظت انا قلت مش انا الكاتبها ده واحد صحبى و نقلتها هنا ليكوا فى المنتدى :)

abo.shoo2

21-05-2008, 09:15 AM

aywa mana 3aref :) tslm 3la enak n2ltha :):)

aljawal

11-12-2008, 08:15 AM

مشكور على القصه

B!G K!D

25-05-2009, 12:31 AM

من كيييييييييييييييييييييييسك ههههههههههههههههههه

Moha Dragon

23-11-2009, 11:20 AM

ايه الروعة دى !
بس المفروض كان يبقى جنب الدرع شادى محمد مش بركات

bishoyrefaat

23-11-2009, 03:12 PM

الكلام ده كتير انا اكون خلصته علي السنه الجايه

bishoyrefaat

23-11-2009, 03:13 PM

هل في اي اختسار

Moha Dragon

23-11-2009, 04:10 PM

طويل بس روعة حاول تقرأه